Bizkaiko lehenengo Ekiola kooperatiba Lea Artibain eratu da
Ekiolaren erakunde sustatzaileek –Energiaren Euskal Erakundeak eta Krean ingeniaritza-enpresa sustatzaileak– Ekiola Lea Artibai martxan jartzea adostu dute Berriatuko, Etxebarriako, Ispasterko eta Markina-Xemeingo Udalekin batera. Lehen une batean sentsibilizazio-lanez eta atxikimenduak erakartzeaz arduratuko den kooperatiba eratzeko izapidetze-fasea hastearekin batera, Lekeitioko eta Ondarroako udalak ere parte hartzeko interesa erakutsi dute. Etxebarrian eguzki-parke fotovoltaiko bat egiteko asmoa du kooperatibak.
Etxebarria, 2022ko urtarrilaren 20a. Iñigo Ansola Energiaren Euskal Erakundeko zuzendari nagusia eta Amagoia Barandiaran Ekiola kooperatibako zuzendaria Ekiola Lea Artibai kooperatiban parte hartuko duten udalerrietako ordezkariekin bildu dira Etxebarriako Udaletxean gaur goizean. Berriatuko, Etxebarriako, Ispasterko eta Markina-Xemeingo udalerriak Bizkaiko Lurralde Historikoko aitzindariak dira beren ingurunean produzitutako energia propioa sortzearen eta kudeatzearen aldeko apustua egiten. Lekeitioko eta Ondarroako udalek ere asmoa dute parte hartzeko. Alkateek 0 kilometroko energia berriztagarria sortuko duen proiektu kooperatiboarekiko konpromisoa erakutsi dute.
Ekiola bezalako kooperatiba sortzea guztiz bat dator herrialdeko balioekin eta egitura ekonomikoarekin, eta, horrez gain, tamaina handiko proiektuak eratzea ere ahalbidetzen du, herritar kopuru handi bat tartean sartzeko modukoak. Hemendik aurrera lanean hasiko dira etorkizunean Iparragirreko Edateko Ura Tratatzeko Estaziotik hurbil dagoen lursail publiko batean kokatuko den eguzki-parke fotovoltaikoa egiteko. Horretarako, inguruneko familiak edo pertsonak proiektuari atxiki beharko zaizkio lehenengo. Hurrengo hilabeteetan gauzatuko dira sentsibilizazioko, proiektua abiarazteko eta kooperatibistak erakartzeko faseak.
EEEko zuzendari nagusi Iñigo Ansola pozik agertu da Lea Artibai beharrezkoak diren pausoak ematen ari delako “laster inguruneko auzotarrek ingurune hurbilenean sortutako energia garbiarekin hornitzeko aukera izan dezaten, horrek dituen abantaila guztiekin; batez ere, herritarren rol-aldaketa, kontsumituko duten energiaren sortzaile izango baitira, eta modu jasangarrian eginez gainera”.
Ekimenaren azken helburua zera da, kooperatiba osatzen duten pertsona edo familiek instalazio fotovoltaikoei lotutako ekonomiak aprobetxatzea, instalazio horiek instalazio propiotzat identifikatzea eta instalazio horietan haien kontsumo elektrikoaren baliokidea den energia kantitate bat sortzea. “Proiektu honen bideragarritasuna kooperatibaren kontsumitzaileek kooperatibaren jabetzaren zati bat erosi behar izatean oinarritzen da, beren etxebizitzaren energia-kontsumoaren baliokidea den kostuarekin”, azaldu du Amagoia Barandiaran Ekiolako zuzendariak.
Europar Batasunaren politikekin lerrokatuta dago proiektu hau, eta helburu gisa ezarri du kontsumitzen den energiaren % 32 jatorri berriztagarrikoa izatea 2030. urterako. Autokontsumoa zein energia-komunitateen sorkuntza hartu beharreko ereduak dira beste energia-eredu baterako trantsizioan. Esparru horretan sortu da Ekiola, energia sustatzeko sozietate gisa. Kasu honetan, Bizkaiko lehenengo kooperatiba dugu. Proiektu honen bitartez, sortzen duten energiaren jabe izango dira kooperatibistak, eta herritarrek beren energia sortuko, sustatuko eta kontsumituko dute.